زي ما قولنا هنا إن عشان نفسي تقدر تجتهد في تحصيل ثمرة رمضان بإذن الله لازم أستعد من قبلها ببعض الإستعدادات و أولها:
1- النية و العزم على التغيير...
على إن فعلا رمضان السنادي لازم يكون شكل تاني
لازم أدخل رمضان و أخرج منه حد تاني
مستحيل ألاقي الفرص دي كلها وأفوت منها حاجة ساعتها هبقى خسران بجد،
زي ما النبي قال بالظبط:
(رغم أنف من دخل رمضان و لم يغفر له)
قالها 3 مرات و جبريل عليه السلام يقول آمين
يعني النبي دعا على اللي يدخل رمضان و يخرج منه زي ما هو بدون أن يحصل على أي حاجة من عرضنا ده
و عشان ميحصلش معاك كده و إن شاء الله تحصل على العرض كامل
لازم تعرف انت ناوي تتغير في إيه؟
تكتب عيوبك و ذنوبك و مشاكلك و تعرف و تحدد و تقرر المشاكل اللي لازم تتغير فيها في رمضان مستغل كل الفرص و النفحات اللي ذكرناها دي
و الموضوع ده ممكن يساعدك
2-
تاني حاجة نستعد بيها لرمضان القرآن
لأنه زي ما قولنا شهر القرآن أنزل فيه
و القرآن كما قال ربنا انزل هدى للناس،
فأكتر حاجة تساعدك إنك تهتدي للخير في الشهر الكريم هو القرآن
فلازم من دلوقت تعود نفسك إنك تعد مع المصحف وقت طويل من غير ما تمل
فابدأ من الآن حط لنفسك ورد يومي طويل شوية عشان تعود نفسك على طول القراءة في رمضان
3-
تستعد بقرار انك مش هتسيب التراويح في المسجد ولا ليلة
إزاي و النبي صلى الله عليه و سلم قال
(من قام رمضان إيمانا و احتسابا غفر له ما تقدم من ذنبه)
يعني هتضيع شرط القيام و تضيع عليك فرصتك
و بعدين التراويح اجرها كبير جدا، قال النبي صلى الله عليه وسلم:
( من قام مع الإمام حتى ينصرف كتب الله له قيام ليلة) رواه النسائي
يعني انت تبقى وقفت كام ساعة بس في الليلة و تروح يوم القيامة تلاقي صحيفتك متسجل فيها قيام ليل رمضان كله
إزاي؟
بالحديث ده
و عشان لا تستثقل التراويح لازم تعود نفسك على طول القيام في الصلاة من الآن
استعد بأنك تقرأ بسور غير السور القصيرة تطول في الصلاة عشان تعود نفسك من الآن
4-
استعد بإنك تعود نفسك عالصيام من الآن
بالذات إنك هتصوم ساعات طويلة و في الحر
فعشان ميضيعش منك اول كام يوم بسبب التعب عود نفسك عالصيام من الآن عشان تؤهلها لمشقة الصيام
5-
استعد بالتدريب على معنى الإحتساب
انك تنتبه دايما للمعنى ده في كل حركة و سكنة في يومك
تتعلم يعني ايه ان كل ثانية في حياتك هي لله
و تحتسب بقلبك أجرها عنده، لأننا زي ما قلنا شرط تحصيل العرض هو (إيمانا و احتسابا) فدرب نفسك على المعنى ده من الآن
6-
و أهم ما تستعد ليه لرمضان هو بعدك من الآن عن التليفزيون،
اللي بيعرض إعلانات المسلسلات من الآن
عشان متشوقش نفسك للمشاهدة ابعد عن التليفزيون اليومين دول
و استعد بجد حتى لا تحرم
و إياك تسيب شياطين الإنس يخطفو منك أحلامك اللي ان شاء الله تتحقق في رمضان زي ما قولنا
شيطاطين الجن مسلسلة اه
لكن للأسف شياطين الإنس مطلوقة على أشدها
أوعى تخلي حد يسرق منك حلمك.. حلم التوبة و التغيير الحقيقي
و آخر ما اختم به...الحديث الجميل إللي ذكرناه في البداية
للنبي صلى الله عليه و سلم
بيديك فيه أمل و بيقولك:
(إن لله في أيام الدهر نفحات، فتعرضوا لها، فلعل أحدكم أن تصيبه نفحة فلا يشقى بعدها أبدا)
أسأل الله أن أكون و إياكم منهم
آمين
