يا رب
هو أنا لو مدخلتش الجنة هعمل ايه؟
هروح فين؟
أنا مظبطة حياتي على اني ان شاء الله في الجنة
مش عارفة لو مدخلتهاش هعمل ايه
انا كل حاجة مخدتهاش هنا بقول لنفسي مش مشكلة نبقى ناخدها في الجنة
و كل حاجة محققتهاش هنا بقول مش مشكلة
نحققها في الجنة
حاجات كتير قوي قوي في حسباني ناوية اعملها في الجنة
و مخططة اني هلاقيها في الجنة
ده انا لما حد بيزعلني اقول معلش بكرة محدش هيزعلك خالص في الجنة
و لما حد من اهلي بيقسى عليا بقول مش مهم
بكرة ربنا هيديني أهل عمرهم ما هيقسوا عليا أبدا
بس لما نروح الجنة
و لما بمشي في الشارع و أشوف عربية حلوة و غالية أقول عادي
هيبقى عندي احلى منها بكتير في الجنة
و لما بنزل عشان اشتري كتاب و ألاقيه غالي و مش معايا تمنه
و أضايق
ارجع اقول ايه المشكلة
هبقى أقراه في الجنة و هيبقى عندي كتب كتييير في الجنة
دنا حتى لما بشتغل على جهازي و يفصل فجأة قبل ما اسيف الشغل ويضيع تعب ساعتين
أقول عادي مفيش كلام من ده في الجنة
يا رب انا كل حاجة بقول في الجنة في الجنة
كل حرمان اتحرمته بصبر نفسي فيه و اقول:
معلش ممكن في لحظة ننتنقل على الجنة و نتمتع بكل حاجة كان نفسنا فيها
بس الان كنت بفكر
طب لو مدخلتش الجنة هعمل ايه؟
هروح فين؟
النار؟
طب و انا يارب هروح النار اعمل ايه؟
ده انا حتى مش هشوفك فيها
امال هعمل ايه
يعني ابقى عشت سنين عمري مش شايفاك
و اروح هناك مشوفكش برده
طب اعمل أيه ساعتها؟
ده انا حتى في الدنيا كنت باتكلم معاك
و كنت بترد عليا برسائلك ليا
هناك بقى حتى مش هعرف اكلمك يارب
ولا هعرف اشوفك ولا هعرف اعمل حاجة خالص
عشان كده مش عايزة ادخل النار و عايزة ادخل الجنة
يارب دخلني الجنة و متحرمنيش منها
يرب اجبر خاطر قلبي و بلغه مناه
يارب اعتقني من النار ولا تحرقني بها
ولا ترميني فيها ثم بي و بمنايا لا تبالي
آمين
2 التعليقات:
اللهم ءامين يااااااااااااااااااااااااااارب
اللهم لا تحرمنا الجنة يارب ولا تحرمنا النظر إلى وجهك الكريم
اللهم أعنا على عمل ما يرضيك وارض عنا وأدخلنا الجنة ياااااااااارب
جزاكِ الله خيرا أختاه وبارك فيكِ
أسأل الله أن يجمعني بكِ في الجنة ويمتعنا برؤية وجه الله الكريم ياااااااااارب
إلى الأمام أخيتي
أثرت مدامعي بتلك المشاعر والمعاني فما أجمل ان تصب نفسك بالجنة؟ والله شعور راقي وجميل جدا فتلك مشاعر الرجاء وما أجمل ختام كلماتك بهذا الخوف , هكذا المؤمن يعيش جنة القرب من ربه بين رجاء وخوف
لا تنسى ان تترك تعليقا..فبكلمة طيبة منك او نصيحة مهذبة قد تغير مسار حياة كاملة