على فكرة في طاعة حلوة قوي دايما تايهة عن بالنا
و هي الدعاء في الأمور البسيطة
الدعاء مش بس في الأحداث الكبيرة في حياتك
زي الابتلاءات و الذنوب و غيره
لأ
الدعاء في الحاجات البسيطة كمان
يعني مثلا موبايلك باظ و عليه حاجات مهمة جدا
ليه متدعيش كتير قبل ما تسعى بكل الطرق لتصليحه
عندك مشوار مهم و في نفس الوقت وقتك ضيق قوي و خايف الزحمة تضيعلك الوقت
ليه متدعيش كتير قبل ما تنزل ان ربنا ييسر طريقك
صاحي من النوم مرهق جدا جدا و متقدرش تأجز انهاردة من شغلك
ليه متدعيش كتير اول ما تصحى ان ربنا يعدي اليوم على خير و يعينك لحد ما ترجع البيت
الدعاء في الامور البسيطة بيبقى طعمه أحلى بكتير
لأن ربنا رب الكبير و البسيط
و بيعلمك ان عجزك مش بس قدام الامور الكبيرة
عجزك قدام الكبيرة و الصغيرة
فما انت إلا بالله في كل أمرك
0 التعليقات:
لا تنسى ان تترك تعليقا..فبكلمة طيبة منك او نصيحة مهذبة قد تغير مسار حياة كاملة