يعني أنا عايزة أفهم حاجة بس
الناس اللي بتقول الدين في المسجد
ممكن يقولولي يعني إيه يعني؟
يعني إيه الدين في المسجد بس؟
يعني أنا أصلي في المسجد و مصليش في البيت يعني ولا ايه؟
يعني مثلا لو اتنين من صحابي زعلانين من بعض و حبيت أصالحهم عملا بـقول الله ( و أصلحوا ذات بينكم)
أديهم معاد في المسجد عشان مينفعش أصالحهم غير فيه
ما هو الدين في المسجد بقى؟
يعني مثلا طيب واحد هو وصاحبه كانوا بيصلوا
وواحد منهم لاحظ إن التاني بيصلي غلط فقام نبهه
و هما خارجين من المسجد لاقاه بيولع سيجارة
مينصحوش بقى مهم خرجوا من المسجد
لكن ياخدوا من إيده كده و يرجع بيه المسجد تاني و يقوم نصحه من السجاير و أضرارها و بعد كده يخرجوا
عشان أصل الدين في المسجد و بس
و بعدين مثلا لو واحد وهو خارج من صلاة الفجر لقا العربية اللي قدام المسجد بتتسرق مالوش دعوة
انا بقولكوا أهو
عشان الدين في المسجد وبس
يعني العربية تتسرق جوه المسجد نكلم و ننصح اللي بيسرق و نذكره بالله
لكن تسرق برة المسجد منفتحش بقنا
نفتحه ازاي؟ ازاي يعني؟
مش الدين في المسجد بس و لا ايه؟
و بعدين من هنا و رايح يا جماعة احنا هنصدق في كلامنا جوه المسجد و نكدب عادي براه
و نبطل نميمة و غيبه جوه و نغتاب عادي براه
ما هو الدين في المسجد بس
و بعدين اللي يلاقي في سكته حد فقير و حب يطلع صدقه و يدهاله اوعي يديهاله في الشارع
معندناش دين في الشارع
ياخدوا كده من ايده لأقرب مسجد و يقوم مديله الصدقة و يمشوا على طول
اه مش عايزين لخبطة بقى
الدين مكانه المسجد
يعني بصراحة أنا هتشل من أرباب هذا الفكر العلماني المتخلف السطحي
ده أحلى حاجة شمولية الإسلام و إنه مسبش حاجة و إلا لما دخل فيها
عشان يبقى يسير علينا نطبقه في كل حياتنا
ده اليهودي راح للصحابي و قاله ما ترك لكم محمد شيئ ، حتى القذر علمكم كيف تتنظفون منه
يعني عايز يقوله ده حتى الحمام علمكم إزاي تدخلوه
بيحسدنا على نبينا
عشان علمنا كل حاجة
و بيحسدنا على دينا عشان شامل و مرن و يصلح لكل حد و كل وقت و أي مكان
التانيين دول بقى عايزين الدين للمسجد و القانون للجميع
القانون اللي بيفصلوه على مقاسهم و محدش يتكلم فيه غيرهم و محدش يتحدث باسمه غيرهم
طب ما الدين قانون
ما هو الدين قواعد و أسس
بس الفرق انها مش حكر على حد
دي كل الناس و الكل يتكلم فيها و الكل يشتغل بيها
ايه ده استنوا استنوا دنا سيت
و كتبت الموضوع ده من البيت
مش من المسجد
0 التعليقات:
لا تنسى ان تترك تعليقا..فبكلمة طيبة منك او نصيحة مهذبة قد تغير مسار حياة كاملة