كنت بقرأ في كتاب
فأتى الكاتب على ذكر الأحاديث الموضوعة
و لمن لا يعرف الحديث الموضوع
هو كل حديث رواه راو منسوب للنبي صلى الله عليه وسلم والنبي لم يتكلم به أصلا
يعني مش من كلامه
كذب
فذكر الكاتب إن هارون الرشيد أمر بإعدام واحد من اللي كانوا بيقولوا الأحاديث الموضوعة دي
فالراجل بيغيظ هارون و بيقوله
و هتودي الألف حديث اللي رويتهم فين؟ رقابتي هتروح بس الأحاديث خلاص الناس عرفوها
فهارون رد و قاله، و هي أحاديثك دي هتروح من "أبو إسحاق" و "ابن المبارك" فين؟
و لمن لا يعرفهما، أبو إسحاق و ابن المبارك دول علماء كبار غربلوا أحاديث النبي وصنفوا منها الصحيح و الضعيف
زي البخاري و مسلم كده
عايزة أقول إن اللي كان بيضع الأحاديث الموضوعة دي
أعداء الإسلام
كانوا عارفين قد ايه المسلمين بيتبعوا نبيهم قوي و بيعملوا بأحاديثه قوي و بيسمعوا كلامه قوي
فلما كانوا يحبوا يبوظوا حاجة في الدين مكنوش بيعرفوا يخلوا المسلمين يروحولها
إلا انهم يقولوا ان الرسول هو اللي قال كده
فيألفوا حديث وينشروه بين الناس يخدموا بيه مصالحهم على انه كلام النبي صلى الله عليه وسلم
يعني مثلا عايزين يبوظوا موضوع الجهاد في سبيل الله
يحطوا حديث على ان النبي قاله يقلله فيه مثلا من قدر الجهاد
عشان الناس متهتمش بيه قوي
لأن المسلمين ساعتها مكنش عندهم صوت اعلى من صوت " قال الله" و قال رسول الله
و دلوقت
بعد ما بقت السنة محفوظة في الكتب
و بعض الصدور
مبقاش حد في عصرنا يقدر يكذب في كلام و يقول ده بتاع النبي
لأن العلماء بيفضحوه على طول
لكن وسيلة اعدائنا الجديدة
انهم هونوا كلام النبي جوه قلوبنا
خلونا نسمع لغيره و ننبهر بغيره و نتبع غيره
فبقيت تقول لحد يا بني الأغاني النبي قال حرام..يقولك يا عم ساعة لقلبك و ساعة لربك
تقولها يا بنتي لبسك كده حرام مش ده الحجاب خالص..تقولك اقنعني
و سبحان الله
كل كلام مسموع و متبوع إلا كلام ربنا و كلام النبي
كل قال فلان من الأدباء أو المشاهير تعجب و تتسمع
لكن نيجي لحد قال الله أو قال رسول الله
و......
اعدائنا مبقوش بيكدبوا على الله و رسوله لأنهم مش محتاجين ده
خلاص
مبقاش ليه لازمة انهم يألفوا احاديث عن الجهاد
لأن المسلمين نسيوا الجهاد أصلا
و حتى لو ألفوا احاديث
فين اللي بيقرا كلام النبي أصلا ولا بيسمع كلامه
الناس لا بقت تسمع لكلام الله ولا بتبع كلام رسوله أصلا إلا من رحم الله و هدى
فيضعوا أحاديث مكذوبة ليه
و البركة في النخبة
أصحاب الإسلام المستنير
اللي هونوا الدين في عيون الناس
و فصلوه عن حياتهم
كأنه جرب الناس عايزة تخلص منه جلودها و لحمها
يارب اعفوا عنا
و رد المسلمين ليك رد جميل
0 التعليقات:
لا تنسى ان تترك تعليقا..فبكلمة طيبة منك او نصيحة مهذبة قد تغير مسار حياة كاملة